Адсто оргодема

Спектаклянь юрсонть – Советской Союзонь Героенть, лётчикенть-истребителенть, гвардиянь старшей лейтенантонть Михаил Петрович Девятаевень алкуксонь эрямосто саевкс. Сонзэ биографиясто сехте содавикс тевесь – салазь «Хейнкель - 111» немецень бомбардировщиксэ концлагерьстэ оргодемась.

Лиссь истя, эрямонть кисэ алкуксонь тюремась ушодовсь мейле, зярдо войнась прядовсь. Натой сестэ, зярдо ломантне ютасть ульцянь лия ёнов – мезеяк илязо лисе, сестэ, зярдо «предателесь» эзь муекшне важодема тарка, сестэяк, зярдо нельгизь менеленть, сон эзизе ёмавто ливтеманзо – Оймень ливтеманзо: те эйкакшонь васенце бажамозо сёлмотнеде, адсто ливтямонзо, кемеманзо сэтьме эрямонть лангс. Сон цидярдсь ды кадовсь Ломанекс. Ули истямо валмеревкс: «Наградась муизе героензэ». Михаил Девятаевень наградась вешнесь эйсэнзэ кувать. Ансяк алкуксонь подвигенть арась ютазь шказо, эрямось весементь ладсесы таркаванзо.

Васенцеде невтезь 2023 иень октябрянь 26-27-це читнестэ.