Эрьзя. Валдос ливтиця
Борис Манджиев
Рамиза Мухаметшина
Анна Репина
Аркадий Манджиев
Спектакляв сувась Степан Эрьзянь эряфста инь стака пингсь: шачем мастору мрдамац. Скульпторть лемоц кайги марнек масторлангса, сонь тифксонза мусть васта инь содаф музейга. Фталу лядсть ризфне-сталмотне – революциясь, Васенце мировой войнась, Гражданскяй войнась – сон илядсь шиса. Сяльде кулсесь вачеда италиянь Миланть седенц ала, тостонга мянць куломада пара ломатть идезь ваймонц. И вов сон комозьда лама киза эряй Аргентинаса. Мусь кеме породань шуфтт – альгороббо, кебрачо, покоди апак лотксек седиень палозь. И вов машты кядь скульпторть лемоц кеподсь инь сери тёганняти - скульптурань искусстваса сон гений. Европань сембе странатне анокт панжемс инголенза эсь кенкшснон. Аньцек Эрьзя ёрай мрдамс Россияв сембе «идензон» мархта.
Кота кизот Эрьзя учси, мзярда нолдасазь Куду. Но СССР-нь художниконь союзть и Искусствань академиять вятиенза ульсть каршект сонь мрдаманцты. Кати сельме каясть, кати пельсть, вов мрдай Эрьзя и синь кяшсыне сонь цильфоц… Ётась сатомшка пинге, сяс катк тянь колга азсазь эсь мяльснон тячиень эряйхне. Кота кизот Эрьзя лисендсь океанть трвас, учендсь инксонза сай пароходть эса. Москуву пачкодемдонза меле Эрьзя нинге ниле кизот учсь, мзярда панжеви тоса выставкац. Тняра киза ётафтсь учендозь. Аньцек эряфсь вдь аф пефтома…
Премьерась ульсь 14 октябрьста 2021 кизоня.