«Театрась учи ваныензон эса» - С. И. Дорогайкина

27 марта 2022
Эрь кизоня 27 мартста уленди театрань сембе работникнень профессиональнай праздниксна—Театрань Всемирнай шись, кона ётни «Театрась кода фкя-фкянь шарьхкодемань и нароттнень ёткса миронь кемокстамань средства» девиз ала.
Мордовиянь театратнень ёткса башка васта занци Мокшэрзянь национальнай драматическяй театрась, конань историяц ушедсь 1932 кизонь 25 августста. Самай тя шиня Мордовскяй облисполкомть Президиумоц примась Мокшэрзянь национальнай театрать панжеманц колга Постановления. Эста од театрать лангса шефства сявсь Государственнай академическяй ёмла театрась (Моску ошсь).
Лама киза ётась ся пингста. Тяни нацтеатраньке—тяфта сонь мокшекс лемнесаськ эсь ёткованк, содаф ламоц лия региоттнень эса. Труппац фалу учсеф инжи аф аньцек Мордовиянь райоттнень, но и шабрань республикатнень эса. Кода молихть-ащихть тефне театраса тяни, Театрань Всемирнай шинь каршеня, пачфтсь Мокшэрзянь государственнай национальнай драматическяй театрать директороц, газетаньконь пара ялгац, мокшавась Светлана Ивановна ДОРОГАЙКИНА.

—Светлана Ивановна, мезе азат Мокшэрзянь национальнай театрать тячиень шинь репертуаронц колга?

—Театрать репертуароц козякоткшни кизоста кизос. Эсонза улихть постановкат кода од ломаттненди, иттненди, стане и оцюфненди, эряфкшуфненди. Мялезе азомс, што «Куйгорожсь» сявсь ни колма Гран-прит Всероссийскяй и Международнай фестивальхнень эса. Тядде тага тердемазь Крыму «Крымская осень» Всероссийскяй фестивальс, кона ётай сёксенда и коза сявсаськ «Куйгорожть». Майста мольхтяма «Майатул» фестивальс. Нинге максоме заявка «Федерация» Международнай фестивальти, кона ули Грозный ошса. Заявкати сувафтоськ «Куйгорож» и «Эрьзя. Летящий к свету» спектакльхнень. Надиятама, удалай молемс национальнай театратнень тя фестивалезост.
Тячиень шить постановканьке молихть и ёмла сценаса. Актёроньке работайхть од ломаттненди пьесать лангса, конань лемоц «Улей», сон ули эрзянь кяльса. Иттненди аноклатама «Пеппи Длинный чулок» спектакль, режиссёрсь Санкт-Петербургста, художниксь Москуста. Андрей Анисимов малай сценаса путы од ломаттненди «Чёрный апельсин» спектакль, конань премьерац ули 17 апрельста. Сяда тов учсетяма Питерста режиссёр—Алексей Истомин кармай работама «Алые паруса» подросткатненди спектакльть лангса.
Меле арьсетяма путомс «Мордовская свадьба» спектакльть. Сонь постановканцты Мордовия Республикань Оцюнясь А.А.Здунов макссь 1 миллион цалковаень тии Грант. Работа карматама мольфтема театральнай режиссёрть Борис Манджиевонь мархта. Спектакльсь ули анок сёксенда, фкя пингть эсонза кармайхть кайгома и мокшень, и эрзянь кяльхне. Лиякс азомс, аф кафта вариантт аноклавихть, а кафта кяльхне сувафтовихть фкя сяка постановкати.
Мокшень кяльса кармай улема Н.В.Гоголень «Ночь перед Рождеством» произведениянц коряс путф спектакльсь, конань ётафтыец В.И.Мишанина.
Конешна, сёксенда ни ушеттама аноклама Од кизоти.

—Национальнай театрать историяса ульсть пинкт, мзярда ашесть сатне кадратне. Тяни кода тянь мархта тевсь ащи?

—Тяни тяфтама стака-сталма мархта, павазонди, аф васьфнетяма. Кадратне сатомшкат. Тядде сявоме труппазонк кафта цёрат и стирь. Кристина Масенина кенерсь ни няфтемс прянц—спектакльса налхкозе главнай рольть.
Мяленьке ладямс соткст Н.П.Огарёвонь лемса Мордовскяй государственнай университетть мархта, штоба ширезонк театрав сашендольхть эрь недяляня преподавательхть и макссельхть мокшень и эрзянь кяльса занятият: част—мокшеннеса, част—эрзяннеса. Штоба сембе труппаньконди улель кода сяда лац тонадомс кяльхнень, сяс мес кой-кит тевс нолясазь диалектнай, рузонь кяльста сявф валхнень.

—Светлана Ивановна, мекольдень пингть подросткатнень и од ломаттнень эряфс кемоста сувась Пушкинскяй картась. Мезе азолеть тянь колга: лама ваныда сашенды сонь вельденза Мокшэрзянь национальнай драматическяй театрав?

—Пушкинскяй картать эряфс сувафтомац—пяк цебярь и эрявикс тев. 2021 кизоня сонь тевс нолдазь Мокшэрзянь театрав сашендсь 3000 малава ломань. Тняра билет меля мифоль аньцек колма ковста. Кда корхтамс тяддеть колга, кафта ковста Пушкинскяй картать коряс миф 1400 билет. Пцтай эрь шиня молихть спектакльхть, конатненди ули кода самс тя картать вельде. Мяльса кирдьсайне илядень и шинь спектакльхнень. Лиякс азомс, Пушкинскяй картась вийса марнек репертуароньконди. Од ломаттне, ётксост школатнень, техникупнень эса тонафнихне, сяда сидеста кочксесазь «Ромео и Джульетта», «Куйгорож» ведущай спектакленьконь, но вешфкссь оцю и лиятненди.
Нацтеатрась Пушкинскяй картать ширенц кирдеманкса тядде ётафты конкурс. Минь кизоньберьф якатама Мордовиянь сембе райоттнень ланга (кой-конатненди меле тернесамазь нинге), но весть уленттяма эрть эса. И вов 2022 кизоть песта улихть тифт итокт. Ся районць, коза якамстонк рамафоль инь лама билет Пушкинскяй картать коряс, ширденк казеви ярмаконь премияса. Сяс ули пинге кярьмодемс тя тевти и примамс участия тя конкурсса.
Эряви азомс, целайнек ширезонк сашендыхть ваныхть и лия региоттнень эзда. Театрась сувси «Зов Торамы» туристическяй маршрутти. Спектакленьконь ванондозь Ульяновскяй, Пензенскяй областтнень эзда, лия вастста сафне.

—Ёфси аф кунара пуроптфоль Национальнай театратнень Ассоциациясна. Эзонза сувась и Мокшэрзянь национальнай драматическяй театрась. Азонтт, Светлана Ивановна, тянь колга сяда крхкаста: мезе максы тя Ассоциациясь нацтеатратненди, кодама тефт тиенди?

—Россиянь нароттнень Культурнай наследиянь кизосна ушедсь Национальнай театратнень Ассоциацияснон пуроптоманц эзда. Тевсь ульсь тяддень 10 январьста Карелиянь Петрозаводск ошса тостонь Национальнай театраса. Национальнай театратнень Ассоциацияснон Учредительнай конференциясост, коза пуромкшнесть ламоц республикатнень эзда 32 театрань руководитель, корхтась Карелия Республикань Оцюнясь А.О.Парфенчиков.
Ассоциациясь тиф Россиянь Национальнай драматическяй театрать (Александринскяй театрать) эгиданц ала. Тянь колга мяльть 2019 кизоня азозе Александринскяй театрать художественнай руководителец В.В.Фокин. Сон и азсь мяльхть-арьсемат Ассоциациять работань планонзон колга. Ётксост: Александринскяй театрать Од сценанц базанц видеса техническяй специальносттнень коряс; Кизонь театральнай школать ётафтомац национальнай театратнень главнай режиссёрснон и художественнай руководительснон кадровай резерваснон анокламать коряс РГИСИ-ть базанц видеса магистерскяй программать тиемац; Москуса национальнай театратнень сценаснон тиеманц коряс работась и лия проекттне.
Конференциять работанц пингста кемокстафоль Ассоциациять Меморандумоц.
Ассоциациясь эстокиге кярьмодсь работати. Кепотьксонди, театразонк сась тердема, конань вельде ули кода кучемс ломань квалификациянь касфтомань фкя ковонь курсс. Минь ня курсненди прважасаськ постановочнай пяльксоньконь заведующаенц Наталья Вячеславовна Паршинать.
Сяда тов арьсевихть ётафтомс курст звуковой, лия оборудованиять мархта работай и лия специалисттненди. Арьсян, синь максыхть оцю лезкс национальнай театратненди.
Тяддень июньцта Якутск ошса Саха Республикать (Якутиять) 100 кизонь юбилеенцты лемтьф Шитнень пингста ётафтови национальнай театратнень Васенце конгрессна, коса кемокстави Россиянь национальнай театратнень Ассоциацияснон работань планцна. Мокшэрзянь нацтеатрась тертьф тя Конгрессти и оцю мяльса приматама эсонза участия.

—Малаткшни Театрань Всемирнай шись. Кода аноклай профессиональнай праздниконцты Мокшэрзянь национальнай драматическяй театрась?

—Театрань шить марнек коллективоньке учсы надиязь и кенярдезь. Праздникстонк инь достойнайхненди макссевихть лепт, казнет, благодарностть. Тяда башка, тя шись тиенди итокт театральнай мекольце кизоньконди: кода работаме, мезе сатоме.
Профессиональнай праздниконьконь карша, ушедоме тундань акция, конань лемоц «День открытых дверей для учителей».
Пингстонза ширезонк ули кода экскурсияс и спектаклень ванома питнефтома самс эрь учительти. Теест няфтьсаськ театрать, залть, семботь лац-ряц азондсаськ, а меле тердьсаськ спектаклень ванома. Сяда тов тя учительти (учительхненди) ули кода самс театрав и вятемс ученикснон, нолямок тевс Пушкинскяй картать.

—Спасиба, Светлана Ивановна, мялень салай корхнеманкса! Малаткшни праздник мархта!

Источник: Газета «Мокшень правда»
Русский 
Мокшанский 
Эрзянский