Ромео ды Джульетта

«Ромео и Джульетта» -- те аволь ансяк мазый вечкемадо ризксэв ёвтамо. Тевтне эйсэнзэ молить аволь XVI пингестэ, кода тенек тонадовсь, -- ней эли, паряк, мик сы шкасто. Те ёвтамось – свалшкань. Эйсэнзэ арасть шкань пирявкст. Монтеккинь ды Капулеттинь кудораськетнень, спектаклясонть мафиянь клантнэнь ютксо, аладямось таргавсь пек куватьс, сынь уш стувтызь сёвномань тувталонтькак, ансяк поладыть пелькстамонть, ды Верона ошонть-масторонть эрямозо моли седеймарямовтомо тюрема ёнов. Ды стяконь таркасо касы покш кажо.

Режиссёрось весе спектаклянть молевксэнзэ кирди миноронть ды мажоронть ютксо, зярдо сельведтнестэ ракамонтень – вейке эскелькс. Ды ваныцянть ёжомарямонзояк шождасто полавтневить. Спектаклянь геройтне эрить течинь чисэ, а арсить сы шкадонть, сынст эйсэ ветить ёжомарямонь нурька кивчкадематне. Превтне ды арсематне эйсэнзэ вийтеметь седейсэ кирвазиця вечкеманть ды авечкеманть каршо. Актёртнэ аволь налксить, сынь эсь геройтнень марто вейсэ марить тонатнень сэредьксэст, вечкемаст ды весе мелявксост – весе истя, кода Италиянь содавикс сеть ломантне.

Васенцеде невтезь 2019 иень ожоковонь 26 чистэ.