Театранть эрямокизэ

Мокшонь-эрзянь государственной национальной драмань театрась – те Мордовия Республикань профессиональной драмань театра, кона ловови республикасонок раськень искусствань прявт куншкакурокс. Сонзэ ули эсензэ репертуарозо, ков совить эрьва кодамо жанрань 40 ламо спектаклят. Ютксост – эрзянь, мокшонь, рузонь ды омбомасторонь драматургиянь коряс путозь весе иесэ ваныцятненень кода классикань кемекставозь лувсо молиця, истя темань ды жанрань коряс тунь одт, течинь вешематнень коряс путозь невтевкст. Анокставить кода рузонь кельсэ, истя жо раськень кельтнесэ рузкс синхронной ютавтовкс марто.

Мокшонь-эрзянь национальной драмань театранть эрямопингезэ ушодови 1932 иень умарьковонь 25 чистэ, зярдо Мордовиянь облисполкомонь Президиумось кемексызе Мокшонь-эрзянь раськень театрань панжомадо Постановлениянть. Од театрантень лездыцякс кармась Москов ошонь Государственной академической Малой театрась. 1935 иестэ театрась анокстызе васенце спектаклянзо – те ульнесь А. Островскиень «Гроза» пьесанзо коряс Малой театрань налксицянть А. Костровонь эрзянь кельсэ путовксозо. Васень шкасто театрась путнесь эрзянь ды мокшонь кельс ютавтозь рузонь ды советтнэнь сёрмадыцятнень: А. Островский «Бедность не порок», Л. Толстой «Власть тьмы», А. Корнейчук «Платон Кречет». Аламонь-аламонь театрась пурнась перьканзо Мордовиянь ды лия региононь эрзянь ды мокшонь ёроков ломанть. Шкань ютазь ламотне эстэст кассть покш артистэкс: К. Тягушев, Н. Костюшев, С. Колганов, Н. Агевнина, И. Аржадеев, Н. Сурайкин, А. Демидова, А. Шаргаева ды лият.

Драматургиянь жанрантень кундыть эрзянь ды мокшонь содавикс сёрмадыцятне П. Кириллов, Ф. Чесноков, К. Петрова, М. Безбородов, М. Бебан ды лият. 1939 иестэ васенцеде путозель эсенек сёрмадыцянь пьеса – П. Кирилловонь «Литова» драмась. 1940 пузозель В. Коломасовонь «Прокопыч» комедиязо. Истя жо ваныцятнень мельс пек тусь П. Кирилловонь «Учительница» пьесанзо коряс спектаклясь.

Эрзянь ды мокшонь сёрмадыцятнень весе путовкстнэ явовтсть мель, ульнесть алкуксонь топавксокс ды неявикс саевксэкс минек республикань культурань эрямосонть. Тиринь валонть вийсэ полавтомс ломаненть оймензэ. Зярдо те валось гайги театрань сценалангсто – сонзэ виезэ седеяк покш. Ваныцятне эзть кекше мельспарост, секетев сёрмалесть ванозенть коряс шнамо валт. Покш таликаст ульнесть буетнева невтевкстнэнь. Спектаклятнень шкасто мерят допрок ёмильть залонть ды сценанть ютксо пирявкстнэ, ваныцятне весе седейсэ мелявтсть геройтнень кисэ, бажасть лездамс тенст мейсэ маштсть. Те шкастонть театрась тагояк кастсь аволь ансяк пек виев артистт, драматургткак.

1941 иестэ П. Кириллов сёрмадызе фашизманть каршо молиця «Кавто братт» пьесанть, конань путызь сценалангс. Ансяк Ине Отечественной войнанть ушодовомадо мейле эрзянь ды мокшонь спектаклят чачность яла седе сеедьстэ. Актёртнэстэ ламот тукшность фронтов. Театранть прявт тевекс кармась Якстере Армиянтень лездамось, масторонок идицятнень икеле мелень кепедиця путовкстнэнь анокстамось. Те тевсэнть тешкстама В. Зорин, С. Колганов, П. Асташкин актёртнэнь.

Мельга молиця иетнестэ путовкстнэстэ седе ламотне ульнесть рузонь кельсэ. Б. Басаргин ды В. Пешонова «Очерки истории мордовского советского театра» вейсэнь книгасост тешкстыть: раськень кельтнесэ сёрмадовкстнэ лиснесть чуросто, раськень кельсэ пьесатнень налксемга эзть сатно эрзянь ды мокшонь актёрт. Секскак те кажонть изнямга арсесть мезеяк полавтомс. МАССР-нь Правительстванть якавтомадонзо мейле 1943 иестэ Саратовань консерваториянть пингстэ панжозель Эрзянь-мокшонь опе-рань студия, иень ютазь – Московонь Луначарский лемсэ государственной театрань институтсо – драмань студия. (Ды те весе теезель войнань пек стака иетнестэ!)

Театрав сыльть важодеме Московонь ды Ленинградонь театрань институтонь прядыцят. Ансяк эрзянь ды мокшонь автортнэнь сёрмадовксосткак путневсть рузонь кельсэ. Содавиксэкс се шкастонть теевсть П. Кирилловонь, К. Абрамовонь, Г. Меркушкинэнь пьесаст.

1989 иестэ, зярдо Москов ошсто Щепкинской училищань прядыцянь курось сась Мордовияв, театрась мерят чачсь одс. Ды стака шканть лангс апак вано, ушодсь важодеме весе вийсэ. 90-це иетнестэ мольсь ташто лувтнень каладома ды одонь, зярс допрок асодавиксэнь стявтома. Театрась ютавтозель ташто кудос, явозель 35 таркас пельсчопода зал. Ансяк, мезеяк лангс апак вано, актёртнэ весе оймест путсть тевентень. Театранть эсензэ режиссёрозо арасель, тердтнесть веёндонь. Путневсть ламо од спектаклят, виде, аволь весе ульнесть виевть, ансяк сыньгак эрявсть ёрокчинь, маштомачинь кастомга. Одс велявтсть сценалангс эсенек раськень сёрмадыцятне. Парсте вастозельть К. Абрамовонь «Эрьванть эсензэ ормазо», К. Петро-вань «Ташто койсэ», Г. Меркушкинэнь «Сенем валда» («Сэнь валдо»), «Поэтть тяштец» («Поэтэнть тештезэ»), «Генерал Пуркаев», А. Пудинэнь «Шава кудса ломать» («Чаво кудосо ломанть»), «Виртян и Валда», «Урозь ваймонди уженя» («Уроз ойментень ужине»), В. Мишанинань «Кда орта лангса суви пине» («Зярдо орталангсо урны киска»), «Тят ша-ва, тят сала» («Иля чаво, иля сала»), А. Терёшкинэнь «Нильгемонь шинь лятфнема» («Нилиньгемень чинь ледстнема»), финнэнь драматургонть И. Кильпиненэнь «Стольлангсо ашо розат» ды ламо лият. Виде, театрась а эряви рузонь ды лия масторонь классикавтомо. Репертуарозонзо совасть А. Островскиень «Доходное место» пьесанзо, Л. Андреевень «Василий Фивейский» (пьесась А. Пудинэнь), В. Распутинэнь «Эряк ды иля стувтне» (инсценировкась В. Долговонь) повестест, В. Шукшинэнь «Латось сыргась» ёвтнеманзо (инсценировкась И. Кузьминэнь), О Нилэнь «Любовь под вязами», Ж-Б. Мольерэнь «Шумбрат, Сганарель» («Лекарь поневоле») пьесатнень лангс спектаклятне.

Меельце иетнень перть театрась ульнесь регионъютконь ды раськеютконь ламо фестивальсэ, аволь весть лиснесь изницякс. 1991 иестэ саезь (сестэ Удмуртия Республикань Ижевск ошсо, седе мейле свал ютавтневсь Марий Элэнь Йошкар-Оласо) Мокшонь-эрзянь национальной драмань театрась свал якси «Майатул» Финнэнь-угрань раськень театратнень раськеютконь фестивальтнес, косто велявтни питней казне марто. «Федерация-92» фестивальсэнть (Москов ош) Л. Андреевень повестензэ коряс «Василий Фивейский» спектаклясь тешкстазь омбоце степенень дипломсо.

2007 иень медьковонь 1 чистэ Мордовиянь государственной национальной драмань театрань од кудось панжинзе кенкшензэ Финнэнь-угрань раськетнень раськеютконь I-це фестивалентень. Инжетнень ютксо ульнесть колмо масторонь прявтветийтне: Россиянь – В. Путин, Финляндиянь – Т. Халонен, Венгриянь – Ф. Дюрчань.

2009 иестэ Равчирень театратнень ютксо эйкакштнень ды од ломантнень туртов раськень артистэнть Е. А. Евстигнеев лемсэ театрань искусствань фестивальсэ Э. Портерэнь романонзо коряс «Уроки радости» спектаклясь (инсценировкась А. Блиновонь) яволявтозь кода фестивалень сехте валдо ды вадряс кемевтиця спектакля. Екатерина Исайчева налксицясь кармась лауреатокс «Фестивальсэ тейтерьавань сехте вадря роль» номи-нациясонть.

2011 иестэ Мокшонь-эрзянь государственной национальной драмань театрась ютавтызе «Штатол» Весероссиянь раськень театратнень фестиваленть. Театрань те форумось мольсь Мордовиясо васенцеде. Ютась Эрзянь-мокшонь раськетнень Россиянь лия раськетнень марто вейсэндявомань 1000 иетнень тешкстамонь покш чинть лувсо ды пурнынзе минек масторонь ламо региононь театрань куротнень.

2019 иень прявт топавксокс театранть туртов кармасть мокшонь ёвксонть коряс В. Мишанинань «Куйгорож» спектаклянть путомга ды «Штатол. Родовая свеча» Раськень театратнень весероссиянь II-це фестивалень ютавтомга Российской Федерациянь Культурань министерствань гранттнэнь идемась. Фестиваленть пингстэ ваныцятненень вете чинь перть невтевсть Марий Элэнь, Чувашиянь, Татарстанонь, Дагестанонь ды Мордовиянь театратнень спектаклят. Фестивалесь явовтсь театрань тевень ламо содыцятнень, блогертнэнь, журналисттнэнь мель. Ламолгадсть театранть ва-ныцянзояк. Ды васняяк истят фестивальтне лездыть театратненень эстесткак панжомс те искусстванть од ёнксонзо, сюпалгавтомс содамочитнень ды ладямс икелев молемань китнень.

Весе 2019 иенть перть театрась ульнесь раськеютконь ды весероссиянь ламо фестивальсэ. Московсо Фольклоронь театрань «Русский остров» раськеютконь IV фестивальсэнть «Ташто койсэ» спектаклясь тешкстазь «Драмань ды музыкань сехте вадря вейсэндямо» ды «Сценической сехте вадря оршамопель» номинациянь дипломтнесэ; Ялтасо «Крымская театральная осень» Раськень театрань фестивальсэ «Вешние воды» спектаклясь сайсь фестивалень участникень диплом; Чебоксары ошсо «Волжская сказка» раськень театратнень фестивальсэ (мольсь Чебоксаронь театрань 2019 иень форумонть лувсо) «Курмай» спектаклясь сайсь диплом «Раськень койтнень ванстоманть кисэ» номинациясонть. Теке иестэнть театрась васенцеде ульнесь «Весёлая коза. Перезагрузка» театрань «капустникень» XVII фестивальсэ (Нижний Новгород) ды «Российский театр – XXI век. Новый взгляд» Приволжьянь театрань форумсо. Театратненень алтазь иестэнть минек театрась тешкстынзе 85 иензэ, ды те кармась покш тевекс аволь ансяк эстензэ театрантень – весе республикантень. Эрявиксчинь коряс аволь седе вишкакс ловома «Радуга сказок» эйкакштнень туртов театрань искусствань фестивалентькак, косо национальной театрань содавикс артисттнэнь марто эсест спектакляст невтизь Краснослободскоень ламо профилень лицеень ды Саранскоень 24 школань тонавтницятне. Теде башка, театрасо ютавтовсь «Театральное Приволжье» студентэнь ды школань театрань куротнень фестивалесь, конань ваномо сакшность 1000 ламо ломанть. Весе иенть перть парсте важодеманзо кис театрась совавтозель культурань государственной 5 учреждениятнень юткс, конатнень республикасонок сехте покш путовксост культуранть ды искусстванть кепедемантень, ды казезь МР-нь Культурань, раськень политикань ды архивень тевень министерствань Дипломсо.

2020 иестэяк театрась поладызе важодеманзо фестивальтнесэ: Эйкакштнень туртов «Арлекин» национальной искусствань весероссиянь XVII фестиваль (Санкт-Петербург); «Майатул» раськеютконь фестивальсэ (Марий Эл) ды «Волжская сказка» регионъютконь фестивальсэ (Чувашия) «Куйгорож» спектаклясь сайсь Гран-при; Раськень театратнень раськеютконь II фестивальсэ (Дагестан) «Куйгорожось» сайсь дипломт колмо номи-нациява.

«Эрьзя. Валдос ливтиця» спектаклясь 2021 иень сёксня «Волжская сказка» фестивальсэнть (Чебоксары) изнясь колмо номинациява, 2022 иестэ Финнэнь-угрань раськень театратнень «Майатул» раськеютконь XIV фестивальсэнть театрась те спектаклянть марто сайсь дипломт «Цёраломанень сехте вадря роль», «Цёраломанень омбоце планонь сехте вадря роль», «Тейтерьавань омбоце планонь сехте вадря роль» номинациятнесэ. Эрзянь-мокшонь театрась – те раськетнень коест ванстомань ды сюпалгавтомань куншкакуро. Республикасонок те вейкине театра, косо путовкстнэ эрсить колмо кельсэ: эрзянь, мокшонь ды рузонь. Сон совавтозь «Зов Торамы» Мордовия Республикань брендэнь маршрунтень, кона лемдеви национальной туристэнь маршрутокс. Театрасонть важодить 30 ламо артистт. Ламотне эйстэст – Мордовия Республикань заслуженной ды раськень артистт, мезесь корты сынст ёрокчидест ды ваныцятнень седейс кинть муемадо.