Семиянь иесь Национальной театрасо панжовсь «Рождественские грезы» од путовкссо
«Рождественские грезы» спектаклясонть, конань путызь Мокшэрзянь драмань театрасо, путовксонь автортнэ ды геройтне вешнить стака кевкстематнень лангс чарькодевикс каршо валт. Режиссёрось Дмитрий Крюков парсте соды, кода дивавтомс ваныцятнень. Лирической комедиянь васенце невтемась ютась даволковонь 4-це чистэ, Семиянь иень панжомань чистэнть.
Вишка сценань залось, актёртнэ пек маласот ваныцятненень. Тевесь моли ютазь пингень 90-це иетнестэ. Секскак чарькодеви кочказь музыкась: гайгить Сергей Никитинэнь, Микаэл Таривердиевень ды Вячеслав Малежикень музыкальной композицияст. Артыцясь Екатерина Крюкова арсинзе декорациятнень ды оршамопельтнень, сон тевс нолды советэнь шкатнеде мейлень оршамопельтнень ды кудонь ули-паронть. Историясь, кона невтеви спектаклясонть, пек мельстуиця ды седейстокиця, сон, паряк, тееви ламо квартирань куш кодамо кудосо.
Спектаклясь путозь советэнь шкань содавикс драматургонть Надежда Птушкинань пьесанзо коряс. Комедиянть ламот ванкшнызь «Приходи на меня посмотреть» фильмастонть, прявт геройтнень тосо налксесть Екатерина Васильева, Ирина Купченко ды Олег Янковский. Пьесанть омбоце лемезэ – «Пока она умирала». Сонзэ парсте содасызь театрань вечкицятне – путовксось моли Россиянь театратнень сценаст лангсо зярыя иень перть.
Те – авадо ды тейтердензэ пейдевтиця история, сынь сэтьместэ эрить Московсо аволь покш квартирасо, мелявтыть вейкест-вейкест кисэ. Ваныцятнеяк ризныть кисэст ды кенярдыть, ськамочисэ эриця аватнень эрямос Од иенть каршо сы алкуксонь уцяска: сынст карми семияст, кадык зярс аволь алкуксонь. Но, кода кортыть тамашань тевень вечкицятне, истят уцяскав минутатнень кисэ эряви эрямскак!
Дмитрий Крюков пачти весенень сехте эрявикстэнть – кадык эрьва ломаненть ули покш ды алкуксонь семиязо, эдь сонтемензэ ломанесь а мари прянзо уцяскавокс.
Саезь «Столица С» газетасто